Thursday, 18 April 2019

KONGAMANO LA KWANZA LA KIMATAIFA LA KIBIASHARA 'TANGANYIKA BUSINESS SUMMIT & FESTIVAL’


 Ofisi ya Mkuu wa Mkoa wa Kigoma kwa kushirikiana wadau balimbali imeandaa 'Kongamano la Kwanza la Kimataifa la Kibiashara' maarufu kama 'Tanganyika Business Summit & Festival’. Kongamano hili la kwanza na la aina yake litafanyika Mkoani Kigoma kwa siku tatu kuanzia tarehe 9 mpaka tarehe 11 Mei, 2019 katika ukumbi wa mikutano wa NSSF. Mgeni rasmi katika Kongamano hilo atakuwa ni Mhe. Samia S. Hassan, Makamu wa Rais wa Jamhuri ya Muungano wa Tanzania.
Kongamano lina lengo la kuwakutanisha wafanyabiashara wa Mkoa wa Kigoma na Tanzania kwa ujumla na wafanyabiashara wa nchi jirani za Burundi, DRC Kongo, Zambia, na Rwanda ili kwa pamoja kujadili na kuafiki namna ya kukuza biashara na uwekezaji kutokana na fursa zilizopo ndani ya nchi hizi hususan kwenye sekta za viwanda, kilimo, mifugo, uvuvi, usafirishaji na biashara kwa ujumla. Kongamano hili litaleta manufaa mengi kwa Mkoa,Washiriki na Nchi kwa ujumla ikiwemo:-
1.    Kutangaza fursa za biashara na uwekezaji baina ya nchi majirani
2.  Kuwakutanisha wafanyabiashara/wawekezaji wa nchi washiriki ili kubainisha fursa mbalimbali za kibiashara na uwekezaji zitakazowezesha kuanzisha na kuendeleza miradi katika sekta za viwanda, kilimo, mifugo, uvuvi, usafirishaji, na biashara kwa ujumla.
3.  Kuanzisha mahusiano ya kibiashara na muingiliano wa kibiashara baina ya nchi za Maziwa makuu za Tanzania, Burundi, Rwanda, Zambia na Demekrasia ya  Kongo.
4.  Kuimarisha biashara za mipakani
5.  Kujenga mazingira mazuri ya biashara na uwekezaji baina ya nchi majirani
6.  Kujenga muingiliano wa wajasiriamali na wawekezaji au wafanyabiashara wakubwaa
7.  Kujenga  moyo na tabia za ujasiriamali miongoni mwa vijana na wanawake wa mkoa wa Kigoma
8.  Kujenga mahusiano ya kudumu baina ya taasisi za serikali,na sekta binafsi miongoni mwa nchi wanachama
Watanzania kutoka Mikoa yote wanaalikwa kuchangamkia fursa hii kwa kushiriki kongamano ili kunufaika na fursa mbalimbali zitakazojitokeza ikiwa ni pamoja na kunadi fursa za uwekezaji na biashara za mipakani, kujifunza mbinu mpya za biashara na uwekezaji kutoka kwa washiriki sambamba na kutafuta wabia, masoko, mitaji na teknolojia mpya.
Kongamano linatarajiwa kuwa na washiriki zaidi ya 300 na litaambatana na maonesho (Exhibition) ya bidhaa na huduma mbalimbali kutoka Tanzania, Burundi; DRC Kongo, Rwanda na Zambia.




Mkuu wa Mkoa wa Kigoma Brig. Gen. (Mst.) Emmanuel Maganga leo amekutana na Bw. Vincent Rico Mkuu wa Mradi wa Madaktari wasio na Mipaka na kuzungumzia namna ya kuendelea kuboresha huduma za Afya Mkoani Kigoma.
Bw. Rico ameeleza kuwa Medical Sans Frontiers (MSF) wataendelea kutoa misaada mbalimbali katika sekta ya afya ikiwemo kusaidia kupambana na Malari, kuangalia namna ya kusaida madawa pamoja na vitendea kazi katia Hospitali na vituo vya Afya Mkoani Kigoma.

Kwa upande wake Mkuu wa Mkoa wa Kigoma ametoa shukrani kwa MSF kwa juhudi zao kubwa katika kuusaidia Mkoa wa Kigoma kwenyemasuala ya sekata ya Afya, amesisitiza kuwa Mkoa wa Kigoma utaendelea kutoa ushirikiano wakati wote ili kuhakikisha wananchi wa Mkoa wa Kigoma wanapata huduma bora za afya. 




Monday, 15 January 2018

WAKALA WA MAJENGO MKOANI KIGOMA WAONYWA KUCHELEWESHA MIRADI

Wakala wa Majengo Tanzania TBA wameonywa kuwa na tabia za ucheleweshaji wa kumaliza miradi mbambali wanayopewa na Serikali jambo ambalo linakwamisha utoaji wa huduma katika miradi hiyo kama ilivyokusudiwa.
Serikali ilitoa fedha kwaajili ya ukarabati wa miundombinu kwa shule na vyuo vya zamani ambazo majengo yake na miundombinu ilikuwa imeshaakaa, kwa Mkoa wa Kigoma shule 1 ikiwemo Shule ya Sekondari ya Kigoam iliweza kupatiwa shilingi milioni 900, ambapo Mkandarasi Wakala wa Majengo Mkoani alipatiwa kazi hiyo.
Hata hivyo kumekuwa na kasi ndogo pamoja na utendaji usio wa kurishisha katika kufanya ukarabati wa miundombinu katika shule hiyo, kitendo ambacho kimefanya kuchelewa kukamilishwa kwa huduma muhimu kama vile vyoo, mabafu na mabweni.
Hadi kufikia muda wa wanafunzi kurudi kuanza muhula mwingine wa masomo mwaka 2018 bado wakala wa majengo Mkoani Kigoma walikuwa bado hawajakamilisha ukarabati wa miundo mbinu ikilinganishwa na fedha mabayo tayari imekwishakutolea awamu ya kwanza shilingi milioni 400.
Hali hii inamtia hasira si Waziri wa Elimu peke yake bali hata Mkuu wa MKoa wa Kigoma ambapo walipofanya ziara ya kukagua kazi zilizofanywa, ikaonekana ni mchezo wa kuigiza.
Akizungumza katika ziara ya kukagua ukarabati wa shule ya sekondari Kigoma Waziri wa Elimu Sayansi na Teknolojia Mhe. Prof. Joyce Ndalichako alimwambia Meneja Wakala wa Majengo Mkoani Kigoma kuacha ubabaishaji na kuendana na kasi ya serikali ya awamu ya tano.
Inaonekana meneja hujui kazi yako, haiwezekani tangu mwezi Agosti 2017 mpaka leo hii hakuna kazi ya kuonekana uliyokwisha imaliza, wanafunzi wanasiku tatu wafungue bado vyoo havieleweki, unacheza na maisha ya binadamu, hili halikubaliki katika serikali ya awamu ya tano alisisitiza Prof. Ndalichako
Naye Mkuu wa Mkoa wa Kigoma Brig. Jen. Mstaafu Emmanuel Maganga ameshangazwa na kitendo cha wakala wa Majengo Mkoani Kigoma cha kushindwa kumaliza ukarabati wa  Shule ya sekondari ya Kigoma pamoja na kuwa Serikali imeshatoa fedha karibu nusu ya gharama kwaajili ya ukarabati tangu Agosti, 2017.

Kufuatia hatua hiyo amabayo inaashiria uzembe, Mkuu wa Mkoa wa Kigoma aliamuru kuwekwa mahabusu Meneja wa Wakala Mkoani Kigoma Bw. Mgalla Mashaka kwa uzembe wa usimamizi na kushindwa kutoa maelezo sahihi ya nini kilichokwamisha kutomalizika kwa ukarabati wa shule hiyo.

ZAIDI YA ASILIMIA 85 KUANZA KIDATO CHA KWANZA JANUARI 2018 MKOANI KIGOMA

Zaidi ya watoto 16,448 sawa na asilimia 67.1  waliofaulu katika mtihani wa Taifa wa Darasa la saba 2017 Mkoani Kigoma wataanza masomo ya kidato cha kwanza mapema Januari 2018 ikiwa ni wale waliochaguliwa kwa awamu ya kwanza.
Haya yametolewa na Afisa Elimu wa Mkoa wa Kigoma Bw. Juma Kaponda katika kikao cha kutangaza matokea ya mtihani wa Darasa la saba Mkoani Kigoma kilichofanyika mwishoni mwa mwaka 2017.
Jumla ya watahiniwa 36326  wasichana 18746  na wavulana 17580 ambao ni sawa na aslimia  99.25 ya wanafunzi walifanya mtihani wa kuhitimmu darasa la saba Mkoani Kigoma mwaka 2017, ambapo kati yao waliofaulu kwa alama za kuendelea na kidato cha kwanza ni 24,528 Wasicha 11,104 na wavulana 13,424.
Aidha wanafunzi waliochaguliwa kujiunga na kidato cha kwanza mwaka 2018 ni 16,448 sawa na aslimia 67.1 ya waliofaulu, hata hivyo wanafunzi 8080 sawa na asilimia 32.9 wamebaki bila kupangiwa shule wakisubiri hatua ya uchaguzi wa awamu ya pili.

 Mkoa umejiwekea mikakatai mbalimbali ikiwemo kukamilisha vyumba vya madarasa, ili kuhakikisha wanafunzi wote waliofaulu wanaweza kuanza masomo mapema kabla ya Februari. Mkoa wa Kigoma umeshika nafasi ya 18 Kitaifa katika ufaulu wa Mtihani wa darasa la saba.

SHULE SHIKIZI ZASAIDIA WATOTO KUPATA ELIMU MKOANI KIGOMA

Suala ala utoaji elimu si jambo la serikali tu bali ni ushirikiano wa sekta binafsi, jamii na serikali kwa pamoja zinaweza kuleta mabadiriko makubwa ya kimaendeleo kieleimu.
umbali kutoka maeneo wanayoishi jamii na sehemu inakopatikana huduma ya elimu imekuwa ni changamoto kwa baadhi ya maeneo hususani vijiji ambapo jamii nyingi hasa za wakulima na wafugaji huishi kwa kuhamahama kufuata huduma za mashamba ya kilimo na malisho ya mifugo jambo amabalo hufanya jamii hizi zikae mbali na huduma za kijamii kama vile elimu, afya, usafiri.
Kijiji cha Kazage katika kata ya Shunguliba Wilayani Kasulu ni moja ya Kijiji ambacho kimepambana na  changamoto ya kuwa mbali na maeneo ya upatikanaji wa huduma za kijamii, suala lililopelekea watoto wengi kukosa fursa ya kupata elimu ya msingi.
Kijiji cha Kazage kipo umbali wa kilomita 10 hadi kufikia huduma ya elimu elimu ya msingi iliyopo katika kijiji jirani cha Shunguliba. Kutokana na umbali mrefu, asilimia 100 ya watoto wenye umri wa kwenda shule hushindwa kupata elimu.
Shirika la EQUIP Tanzania linalojishugulisha na mpango wa kuinua ubora wa elimu, ndilo limekuwa msaada katika kijiji cha Kizage kwa kuwaokoa watoto walioshindwa kupata elimu ya msingi likaja na mpango wa kusaidia uanzishwaji wa ‘Shule Shikizi’.
Shule shikizi zinatokana na shule mama zilizopotayari na zenye miundombinu kamili, shule hizi hujengwa ili kusaidi watoto waliokosa fursa ya masomo ya awali.
Kutokana na uhitaji wa elimu EQUIP Tanzania imeweza sasa kusidia ujenzi wa madarasa mawili ya shule shikizi katika kijiji cha Kizage, ujenzi wa madarasa mawili hadi sasa umesaidia watoto kupata elimu kwa asilimia.
Mtendaji wa Kijiji cha Kizage Bw. Timoth Zabronia anatoa ushuhuda wa faida za shule shikizi namna zilivyosaidia kuinua elimu kijijini hapo akisema “watoto wet hapa walikuwa wengi hawasomi kutokana na umbali mrefu hadi kuifikia shule mama iliyopo Kijiji cha shunguliba, sasa tunashukuru mradi wa EQUIP Tanzania kwa kuona umuhimu wa watoto wetu kupata elimu kupitia shule hizi shikizi sasa watoto wengi wameanza kupata elimu ya awali na hatimaye kuendelea na darasa la kwanza”
Wananchi wa Kizage wanato shukrani na pongezi kwa mradi wa EQUIP Tanzania ambayo imekuwa ikiwahamasisha kujenga maboma ya madarasa na kasha kusaidia hatua ya upauaji na samani za madarasa, kwa nguvu hii, wakazi wa Kizage wameweza kufyatua tofali kwa nguvu zao na kujenga madarasa mawili pamoja na ofisi ya walimu katika shule shikizi ili kuondokana na adha ya kukosa elimu watoto wao.

Sunday, 10 December 2017

Nzunda awataka Maafisa Elimu kutenda haki kwa Walimu

W
atendaji wa Sekta  ya elimu Mkoani Kigoma, wametakiwa kutokuwa kisababishi cha kwanza kuwavunja moyo wafanyakazi walimu kwa namna yeyote bali wasaidine nao katika kuleta kuboresha na kuleta matunda bora kwenye sekta ya elimu.

Naibu Katibu Mkuu Ofisi ya Rais Tawala za Mikoa na Serikali za Mitaa (TAMISEMI) ambaye anashugulikia Elimu Tixon Nzunda ameyasema hayo wakati wa ziara yake Mkoani Kigoma ambayo ililenga kukagua miradi mbalimbali ya elimu ikiwemo ukarabati wa shule kongwe pamoja na vyuo vya ualimu, kukagua miradi elimu inayofadhiliwa na wahisani mbalimbali namna inavyotekelezwa Mkoani Kigoma.











Naibu Katibu Mkuu Ofisi ya Rais Tawala za Mikoa na Serikali za Mitaa (TAMISEMI) ambaye anashugulikia Elimu Tixon Nzunda akipata maelezo ya ukarabati wa Shule ya Sekondari ya Kigoma


Akiongea na wakurugenzi, maafisa elimu , waratibu wa elimu na walimu wakuu Nzunda aliwaambia kumekuwa na tabia ya watendaji kuwadhulumu walimu haki zao ikiwemo fedha za likizo, fedha za masomo kwa waliokatika mpango kadri ya mahitaji ya halmashauri, jambo ambalo limekuwa likiwakatisha taamaa na kuwavunja moyo waalimu.
“Mwalimu anakuja kwako wewe kama kiongozi wake na anashida za msingi kabisa lakini kutokana na sababu zako tu unamkwamisha, tusiwe vikwazo kuwakatisha tama walimu kwa kuwaonea kwenye haki zao bali tufungue milango kuwasikiliza na kuwapa ushauri Afisa elimu wa Halmashauri, kata na Mkuu wa Shule asiyejali waalimu wake huyu hafai kabisa kuwa kiongozi” aliongeza Nzunda.

Katibu  Tawala wa Mkoa wa Kigoma  Charles Pallango (kushoto) na Naibu Katibu Mkuu Ofisi ya Rais Tawala za Mikoa na Serikali za Mitaa (TAMISEMI) ambaye anashugulikia Elimu Tixon Nzunda wakizungumza na uongozi wa wa Shule ya Sekondari ya Kigoma (hawapo pichani)


Nzuda amweataka watendaji kufanya kazi kwa uwajibikaji, uadilifu na weledi pamoja na kuwa wasikivu kwa kushughulikia matatizo ya umma.
Aidha suala la usimamizi thabiti wa miradi amesema lisiwe kwa sekta ya elimu peke yake bali miradi yote isimamiwe kikamilifu ili kuleta tija na maendeleo kwa wananchi.
Katika kukagua miradi ya ukarabati wa shule ya sekondari ya Kigoma Ndunda ameonesha kutoridhishwa na utendaji kazi wa wakala wa majengo Tanzania ambao unasuasua pamoja na kupewa fedha yote ya ukarabati wa miundombinu ya shule hiyo.



MKOA WA KIGOMA KUWA KINARA WA KILIMO CHA ZAO LA CHIKICHI






Mkoa wa kigoma umenuia kuwa kinara wa kilimo cha zao la chikichi na kuzalisha bidhaa mbalimba zitokanazo na zao hilo kwa kuanzisha mpango kazi kabambe na mikakati ya kilimo cha chikichi.
Uongozi wa Mkoa wa Kigoma umeandaa mpango wa kuendeleza zao la chikichi unaozingatia kunua zao hili ili liwe sehemu kubwa ya bidhaa ghafi katika kufanikisha adhma ya viwanda vya Mkoa kuanzisha kiwanda cha kuchakata mawese.
Takwimu zinaonesha kuwa mwaka wa 2000 hadi 2007 zaidi ya 95% ya mafuta ya kula yaliyoagizwa nchini yalikuwa ni mawese. Pia takwimu zinaonesha kuwa kwa mwaka wa 2016, mahitaji ya Taifa ya mwezi ya mawese yalikuwa ni tani 50,000, wakati uzalishaji wa mafuta haya kwa mwaka ni tani 40,000 zikiwemo tani 30,000 zinazozalishwa na Mkoa wa Kigoma 
Kutokana na takwimu hizi ni dhahiri kuwa uzalishaji wa mafuta ya mawese haukidhi mahitaji ya Taifa ambayo ni tani 600,000 kwa mwaka ikiwa ni upungufu wa tani 560,000. 
Uagizaji wa mafuta ya mawese umeongezeka kutoka tani 3,000 mwaka wa 1978 hadi tani 510,000 mwaka jana 2016 na utaongezeka kwa miaka ijayo.
Aidha utumiaji wa fedha za kigeni kuagiza mawese kutoka nje umeongezeka kutoka dola za kimarekani 13,000,000 mwaka 1961 hadi zaidi ya 320,000,000 kwa mwaka wa 2016. 
Kigoma ni Mkoa pekee unaolima zao la michikichi kwa wingi nchini Tanzania ukiwa na hekta 18,924 zenye michikichi inayozalisha tani 30,010 ambayo ni tani 1.6 kwa hekta za matunda ya chikichi. Uwezekano wa uzalishaji ni tani 75,700 sawa na tani 4.0 kwa hekta kwa eneo lililopo lenye michikichi.
Hali ya uzalishaji wa chikichi Kigoma kwa sasa inaonekana kuwa bado ipo chini kwa sababu uzee wa michikichi iliyopo, mashamba kutokutunzwa kitaalam, ukosefu wa mbegu bora pamoja na teknolojia duni ya uchakataji wa zao hilo.
Mpango wa Mkoa unalenga kuwa na viwanda 7 vya kisasa vya kusindika malighafi itakayozalishwa, Kiwanda kikuu kimoja kitakachoweza kusindika mawese ghafi, Viwanda vidogo vinne vitawekwa kwenye vijiji vitakavyopendekezwa na MSM, Kiwanda kimoja kwa ajili ya usindikaji wa mafuta ya alizeti. Baada ya miaka kadhaa, Mkoa unatarajia kujenga kiwanda cha kutengeneza gesi kutokana na mashudu ya michikichi.
Ili kuongeza tija ya zao la chikichi Mkoa unahamasisha wilaya zote zenye maeneo yanayofaa kwa kilimo cha chikichi, kufufua mashamba na kuanzisha mapya. Pamoja na kuvutia makampuni binafsi kuzalisha miche bora na kuisambaza kwa wakulima. 
Mpango wa kuinua zao la chikichi Kigoma umepanga kuanza na wakulima 100,000 ambao watapewa mbegu 
zilizoboreshwa (chotara) kila mmoja miche 150 ambayo itatosha kupanda eneo la hekta moja ekari mbili na nusu.
Kwa sasa mbegu bora hazipatikani nchini kwetu bali zinaagizwa kutoka nchi kama Costa Rica, Malaysia na Indonesia kwa gharama ya dola ya kimarekani moja kwa mbegu moja. 
Njia mbadala ambayo Mkoa umepanga ni kuwa na kituo chake cha uzalishaji mbegu na maabara. Hiki kituo kitafanya utafiti na uzalishaji wa miche bora kwa kutumia mfumo wa kisasa ili kuzalisha miche mingi kwa gharama ndogo na kwa  muda mfupi.
Uongozi wa Mkoa wa Kigoma unaona kuna umuhimu wa zao la chikichi kuwa na bodi ya zao la chikichi ili kusaidia uendelezaji wa kilimo cha zao hilo. Aidha, wananchi wabadilishwe mtazamo juu uendelezaji wa zao la chikichi. Wananchi wahamasishwe ili wajiunge na walime kupitia vyama vya ushirika.