Mkoa wa Kigoma na mafanikio katika Sekta ya Afya.

 

Moja ya zahanati zilizojengwa hivi karibuni Mkoani Kigoma

Mkoa wa Kigoma na mafanikio katika Sekta ya Afya.

     Sekta ya afya ni sekta mhimu katika nyanja zote za maisha ya mwanadamu. Hii ni kutokana na baadhi ya misemo ya wahenga ambao hudiriki kusema kuwa “Mtu ni Afya”.

    Hii ni dhahiri kuwa bila afya uhai wa mtu au kiumbe chochote utakuwa matatani kwani afya ndio kichocheo cha mfumo mzima wa utendaji wa shughuli zote za ndani na nje ya mwili wa mwanadamu.

     Ebu tumulike kurunzi letu katika sekta ya Afya ndani ya Mkoa wa Kigoma ambao kwa takribani umepiga hatua katika sekta mbalimbali ikiwemo sekta ya Kilimo,Elimu na nyinginezo.

  Kwanza kabisa napenda kuupongeza Uongozi wa Mkoa kwa kuonesha jitihada mbalimbali katika kuboresha  huduma za jamii kwa kiwango fulani.

    Mkoa wa Kigoma wenye Jumla ya Hospitali sita huku tatu kati ya hizo zikimilikiwa na serikali na tatu zikimilikiwa na mashirika ya dini, vituo vya kutolea huduma 247 ambapo sita kati ya hivyo ni hospitali, 22 ni vituo vya afya na zahanati zikiwa 219 umekuwa katika mchakato wa kuimarisha vituo hivyo ili kuweza kutoa huduma zenye tija kwa wanajamii.

Katika Uboreshaji huo unaolenga kutoa na kuweka Mazingira bora ya kufanyia kazi kwa Watumishi, vituo vingi vya serikali vinajenggwa na kuimarishwa kupitia fedha za ujenzi na ukarabati wa vituo vya kutolea huduma(JRF) na Mfuko wa Maendeleo ya Afya ya Msingi(MMAM).

    Je, licha ya serikali kuwa na Mpango na adhma ya kuboresha vituo vya kutolea huduma za afya, huduma zinazotolewa zinakidhi idadi na ubora wa huduma hizo?

 Hii inawezekana jibu lake lipo katika kauli mbiu ya serikali ya Awamu ya nne yenye Mpango wa kuwepo kwa zahanati kila kijiji na Kituo cha afya kwa kila Kata ambapo kwa dhana hiyo, Mkoa una upungufu wa zaidi ya zahanati mpya 38 na vituo vya afya 98.

    Hata hivyo, licha ya afya kuwa muhimu sana, bado Mkoa unaupungufu wa Watumishi katika hospitali za Wilaya na Mkoa ambapo hospitali zote hizi zina Jumla ya Watumishi 955 wa kada zote ambapo Watumishi wanao hitajika kulingana na Ikama ni 2747 ambayo inonesha kuwa idadi ya Watumishi waliopo ni asilimia 34.7.

     Jitihada za makusudi zimeendelea kuwekwa hali inayoonesha Ufanisi mkubwa hususani katika kuupiga vita ugonjwa wa Malaria na Maambukizi ya Virusi vya UKIMWI ambapo kulingana na matokeo ya Malaria na UKIMWI (THIMS 2011/2012) uliofanywa na ofisi ya Taifa ya Takwimu unaonesha kuwa Mkoa wa Kigoma unakiwango cha maambukizi asilimia 3.4 kulingana na wastani wa Kitaifa wa asilimia 5.1 hali inayoashiria Ufanisi na mafanikio makubwa unaofanywa na sekta ya afya katika Mkoa wa Kigoma.

 Sambamba na hilo, huduma za UKIMWI zinatolewa katika vituo vyote vya  Mkoa wa Kigoma kupitia Halmashauri zote ambapo Kigoma Ujiji vipo 21, Kigoma Vijijini 76, Kasulu 77 na Kibondo 63 huku serikali na watu binafsi kama  wakihusika katika utoaji wa huduma hizo zoezi ambalo huonesha Ufanisi mkubwa katika sekta ya Afya Mkoani Kigoma.

   Katika kuleta ubora wa hali ya juu katika sekta ya Afya ndani ya Mkoa wa Kigoma , vita dhidi ya Malaria katika vituo vya Afya imeshika kasi ambapo Takwimu kutoka katika vituo vya Afya zinaonesha kuwa bado Malaria inaenea kwa kasi japo Mpango wa kusambaza vyandarua vya bure kila Nyumba umefanikiwa.

  Ili kuweza kujibu maswali na kuepukana na Matatizo yasiyokuwa ya lazima katika sekta ya Afya , serikali kupitia wadau mbalimbali inadhamiria kuweka sera nzuri itakayo ongeza idadi ya Watumishi wa Afya, sera itakayo andaa Mazingira mazuri ya kufanyia kazi kama ujenzi wa Zahanati, Vituo vya Afya na Hospitali.